Joy-Con當鼓棍！ 太鼓之達人 登陸Switch
喜歡玩「太鼓」遊戲的機迷，相信會十分期待任天堂今夏大作《太鼓之達人Nintendo Switch版》。既可以插電視玩，又可以帶出街隨時隨地同朋友一齊打太鼓，加上Switch的Joy-Con設計，《太鼓之達人》與Switch根本就一拍即合。一齊睇睇Switch版仲有啲乜嘢好玩新元素啦！（文：陳偉斌 圖：互聯網圖片）
使用Joy-Con當作鼓棍，好處係唔使再買遊戲專用鼓棍，慳返唔少。
收錄超過70首歌
凡是音樂類遊戲，大家都會好關注收錄咗邊啲歌。Switch版《太鼓》就收錄咗超過70首歌，當中包括《你的名字》主題曲〈前前前世〉，亦有《龍珠Z》及《新世紀福音戰士》的主題曲。除咗一貫嘅日本流行曲、動畫歌、遊戲歌、古典音樂之外，仲會有Switch遊戲專屬歌曲，例如《Super Mario Odyssey》及《Splatoon2》的主題曲，之後亦有好大機會追加新曲目，真係有排玩。此外，今集另一新元素係可以選擇「演奏角色」，每個角色都有特別能力。例如「鼓棍」可以將紅藍音符全部合一（唔分色，總之打到就計分），而「燈籠魚」就可以增加連打能力。
新元素可以選擇「演奏角色」，每個角色都有特別能力。
四人合奏 打到手軟
遊戲開發商Bandai Namco近期陸續公布《太鼓之達人Nintendo Switch版》的新消息，包括多達70首曲目、新增的「演奏角色」元素，以及最多四人一齊玩等等。
大量Mini game供四人一齊玩。
Switch版《太鼓》的一大特色就是可以使用Joy-Con體感打鼓。具體操作為垂直揮動為「咚」、斜向揮動和按住L或R豎直揮動為「哢」。只要手持Switch的Joy-Con當作鼓棍，基本上就等同街機的玩法，只是沒有一個實質的鼓讓你打下去。
垂直揮動為「咚」、斜向揮動和按住L 或R 豎直揮動為「哢」。
從最新公布的畫面可見，Switch版《太鼓》將支援多人遊戲模式，除了二人的太鼓對戰之外，更有大量Mini game可供四名玩家一齊玩，進一步將《太鼓》發展成為招呼親朋好友必備的Party game。
遊戲可供四名玩家一齊玩，但必須要有四部主機和遊戲。
