沙灘潮拖一覽

夏天又嚟到，又係陽光與海灘嘅季節，一個性感誘惑嘅泳裝造型當然矚目全場，但係記得記得千祈唔好「觀音頭掃把腳」，有性感泳衣當然要有番對靚靚沙灘拖鞋襯返。以下即介紹返今個夏天最新沙灘拖，奢華如Miu Miu、Thom Browne，平價則有Accessorize、Ipanema等，任君選擇！

Accessorize民族幫拖

來自英國的親民飾品牌子Accessorize，拿手好戲當然係品牌最得人鍾意嘅民族風格，編織民族圖案、彩色珠仔串、珠片、紮染令波希米亞風粉絲愛不釋手！而今夏新款又嚟繼續玩民族風，雖然唔算好有新意，但就勝在夠曬抵買，為下水禮做好準備！拖鞋系列以條子、草織、織帶等民族元素為主，另外更加入Anchor等等嘅水手風圖案，同場加映還有泳裝系列。

彩色條子織帶沙灘拖鞋 HK$112

彩色條子比堅尼泳衣 HK$565

彩色鸚鵡圖案沙灘袋 HK$545

Thom Browne腳踏海洋

今夏Thom Browne擁抱陽光與海灘，就喺S/S17嘅男裝天橋上，全系列就與沙灘滑浪主題緊扣，大量採用海洋主題圖案如太陽、波浪、鯊魚、滑浪板，以及木槿花等等，而系列中當然亦有包括沙灘拖鞋，以品牌嘅標誌色紅、白、藍為熱帶植物嘅圖案設計，現於香港Joyce有售。

紅白藍色熱帶植物圖案塑膠沙灘拖鞋 HK$4,600

Ipanema南美熱浪

南美洲嘅陽光與海灘，個個都想感受下，其中位於巴西嘅著名旅遊景點Ipanema沙灘係一個富有濃厚南美文化風情嘅熱鬧地方，巴西鞋履品牌Ipanema就取其名為其宗旨，希望所有穿著Ipanema嘅人，都可以感受到巴西嘅熱浪。今個夏天，品牌當然力推新款沙灘拖，就以Ipanema沙灘為設計靈感， 採用熱帶植物圖案、南美民族圖案等等，睇下感唔感受得到巴西風情！

粉紅色Tropical print塑膠沙灘拖鞋 MOP 199

啡色綴民族珠串塑膠沙灘拖鞋 MOP 199

Miu Miu貴價「花膠」

每到夏天沙灘膠拖都傾籠而出，不過好多人都覺得「膠拖鞋平平哋就算」，但其實沙灘拖都可以好Luxury，講到近年心頭好，當然係上年CharlotteOlympia同巴西拖鞋Havaianas合作嘅限量人字拖，雖然只係膠拖，但幾百蚊就買到CO，的確可以滿足虛榮感，但比起最近Miu Miu新推嘅沙灘拖系列，就似乎更加虛榮。共七色，鞋邊採用不規則起伏設計，而鞋面鞋底均壓上立體花卉圖案，沙灘「曬」命必備。

Miu Miu花卉壓紋圖案塑膠沙灘拖鞋（包括桃紅、橙、粉藍、粉紅、藍、綠、紫色）各MOP 3,200