食肉獸鋸扒大作戰
記得以前話去食西餐，老一輩嘅人都必然想到與「鋸扒」掛鈎。時至今日，西餐多了很多選擇，但去「扒房」鋸份扒仍是不少「食肉獸」的心頭好。扒房大概喺18世紀開始係興起，當時「扒房」未有咁正式，比較似依家見到嘅茶餐廳，牛扒只係一塊塊「Chop」好嘅肉。今時今日，扒房用料都愈來愈高級，除了熟成牛扒，重提供海鮮盤配搭。而環境由較為「藍領」餐廳變成「白領」優雅氛圍。所以現在，無論二人浪漫進餐定係好友Gathering，扒房都係唔錯選擇。
火山石烤海鮮盤
獲獎連年嘅金沙「高雅扒房」係澳門出色扒房代表之一，其出品喺澳門的確鮮逢敵手。餐廳除了澳洲和牛外，也有選用美國出品的牛種，而且重係「USDA Prime」，絕不欺場。拿手好戲當屬「肉眼扒」，除咗牛扒級數有番咁上下之外，主廚會用火山石爐高溫烤製，使溫度穩定、受熱均勻。另外烤製時逼出嘅油脂在熱力作用下，會為牛扒「鍍」上一層煙燻滋味！牛扒外表富有光澤，內裡呈粉紅色，入口香脆而內裡嫩滑，火喉控制得剛剛好。除了牛扒，餐廳的「香烤雜錦海鮮」也頗有特色，皆因海鮮盤通常用冷盤做法，而「高雅」就用燒烤方法炮製，做法比起冷盤食落更加惹味，配料味道充分滲入海鮮當中。
肉眼扒 MOP 378起
「高雅扒房」出品的牛扒，如果一人食用，12安士就剛剛好，如此大小的牛扒更能突顯師傅火喉控制的功力。（李國星攝）
香烤雜錦海鮮 MOP 788
海鮮陣容鼎盛，龍蝦、鮑魚、大蝦、蟶子、焗蠔等一一在列。
香煎珍寶蟹餅配韃靼汁 MOP 158
蟹肉每日新鮮即拆，切開條條分明，入口爽口惹味。
邊睇Show邊食風乾牛扒
路氹永利皇宮開幕後，裡面「SW扒房」旋即成為話題餐廳。皆因扒房每隔30分鐘，就會有由舞台設計大師同永利皇宮打造嘅動畫Show，邊鋸扒邊睇Show嘅食府澳門少有。講番食物，餐廳主打「風乾連骨肉眼牛扒（850克）」，採用澳洲年度最佳飼養場的牛肉，再用自家熟成機風乾30至40日，令肉質更嫩滑多汁。牛扒建議只烤至五成熟，表面帶有微焦，清楚看到外圍淺啡的肉質包圍著中間粉嫩半熟部分，入口肉汁隨即爆發，肉質嫩滑而牛味道濃郁，餘韻悠長。除此之外，「阿拉斯加蟹餅」也是另一得意之作，用上阿拉斯加蟹肉，加上近十種配料一齊輕炸，進食時有如吃一塊大蟹扒，啖啖滿足滋味。
SW精選漁獲 MOP 1,188起
兩層海鮮盤中，下層放著龍蝦、帝王蟹腳及珍寶大蝦等常客，上層就是季節貝類，讓大家當季嚐鮮。
漏斗蛋糕 MOP 160
作為一餐完結，當然唔少得甜品，這個招牌甜品造型特別，另配朱古力、焦糖及忌廉醬，風味獨特。
風乾連骨肉眼牛扒（850克）MOP 720
牛扒份量十足，適合多人分享，建議配搭蛋黃醬，入口更加香濃。
台式熱賣鐵板牛扒餐
自6月初開始，東望洋街加入了新成員，餐廳名為「老爹套餐」，原來係將台灣夜市極受歡迎的鐵板套餐模式帶來澳門。雖然位處住宅區，但用料一啲都唔馬虎，鐵板套餐主打頂級牛扒、厚切豬扒等，其中店內熱門之選，就有西冷、肋骨牛扒和牛小排三款，選用「USDAPrime」級牛扒，絕對係誠意表現。除此之外，都有各式鐵板蓋飯套餐，餐中配有沙律、麵包和湯，款款都份量十足。而每晚10時開始，餐廳就馬上進入清吧主題，供應多款手作小食，同埋多款精選啤酒飲品，實行在澳門重現台灣夜市的熱鬧氣氛。
16oz丁字骨牛排餐 MOP 198
16安士的牛扒餐實在是重量級之作，牛扒煎得恰到好處，肉汁豐富。
