拍案驚奇▪本土真人真事改編 望廈魔鬼山

「澳門望廈」這個名字，相信是澳門人的都不會不知道，甚至在歷史書上，也佔有一席位置， 例如著名的《望廈條約》。記得我還在讀書的時候，放學經常到其附近的小食店買魚蛋，再去打藍球。而那時最出名的，還要數魔鬼山一說。

我想，當年幾乎每個男生的夢想，都是相約喜歡的女孩子去魔鬼山吹吹水、看看風景。聽說，在那兒吹出來的風，就像狼犬的吠叫一樣，令人發寒。像這樣的地方，比較乖巧的女孩都肯定會害怕，一定會捉緊你的手。所以，在去田雞山、表白湖之前，還得要走走魔鬼山。

「猴子哥，聽講你今個星期約咗翠兒去魔鬼山喎。」花仔笑著說。

「係啊！去跑跑山，做做運動。」猴子哥笑著說。

「得啦，大家男人，明白嘅。」「花仔，有咩招式，教教路好喎。」猴子哥續說。

「無問題，中午嗰餐就你請。」花仔靠在學校三樓的欄杆上，望著球場說。

「得啦，成事嘅話再加多餐。」猴子哥回答。

「嗱！記得攞多件長袖外套去，自己就有咁薄著咁薄。」花仔說。

「唔明喎，講清楚少少？」

「今晚上到去，望住關口方向，啲風聲好似狼叫咁，好得人驚.。到時條女肯定寒一寒，個心一寒個身就會凍。到時候你咪除件外套畀佢著囉。」花仔一邊偷笑，一邊說。

「咁同我著得薄有咩關係呢？」

「話你戇X，怕你嬲！話你番薯，嫌你大兜。」花仔得意地講了兩句口頭禪，接著再說：「啲女見你為咗佢著到咁薄，個心一定會感動。記得，你就算唔凍都要發冷，不過唔好咁明顯，等佢關心你嗰陣，再乘機同佢講，話你隻手有啲凍，叫佢幫你保下暖。」

「即係乘機拖住佢？」猴子哥說。

「醒喎，今次一講就明。」

「咁……跟住呢？」

「嘩！狼到！拖住都未夠喉啊？」花仔奸笑了一會，接著說：「如果成功拖住嘅話，再走去下邊嗰度，特別黑，再拖佢埋去，直接扮凍攬住佢。」

「果然係聖手！」猴子哥愈聽愈興奮地說。

「嗱，咪話我冇教你絕招！」

花仔立刻衝回課室，拿出一本名為《最恐怖的鬼集》的書，又說：「睇熟一兩個故仔，到時黑黑地又無乜人，就搵機會講鬼故。」

「好好好！成事請你食飯。」猴子說。

「咩成事？一陣中午就要請啦！」月兒，漸漸地取替了紅日。

本來黃昏是充滿傷感的，但此時的猴子哥，卻興奮不已，急不及待地等著八時的來臨。

猴子哥吃過飯後，對著鏡子梳頭超過半小時，然後才滿意地出門。

他一邊向著魔鬼山的方向走，一邊盤算著一會兒可能發生的事。

「翠兒。」在不知不覺間，猴子哥已到達約定會合的地方，看見了心中的女神。

「咁早嘅。」翠兒害羞地打招呼。

「係啊，次次做運動都會早出門……」猴子哥看見翠兒的一身短衫短裙裝束，立刻全身僵硬得語無倫次。

「咁我哋依加喺邊度開始跑步？聽人講，山上邊好猛鬼……」翠兒小聲地問。

「怕？怕咩啊！有我喺度。山上多氧氣，跑步係帶氧運動，上山跑效果會好好多。」猴子哥回答。

「但我有啲驚……」翠兒擔憂地說。

「有我保護你就得啦！」猴子哥答話後，就把半推半就的翠兒帶了上山。

（待續）