童玩繽紛暑假

小朋友期待已久嘅暑假已經開始，相信各位家長已計劃好同小朋友去邊度旅行，等小朋友過個開心暑假兼且大開眼界。工作繁忙嘅家長，未必抽到時間請假帶小朋友周圍飛，好在澳門近年多咗好多專為一家大細而設嘅遊樂場，除咗可以滿足小朋友大玩特玩嘅心願之外，有些遊樂場更特別設有不同款式嘅電子遊戲機，小朋友啱玩之餘，連父母都可以回復童真一齊玩，一家人共度歡樂時光。

超級英雄歷險 科幻卡通遊樂園

想在澳門玩機動遊戲？有新濠影滙的「8 」字形摩天輪。其實新濠影滙內，都有好多好玩設施，除咗4D多媒體劇場「蝙蝠俠夜神飛馳」，重有啱曬一家親玩樂嘅「華納滿Fun童樂園」。樂園佔地4,000平方米，有多個遊樂設施，例如一入門口就見到嘅「反斗彈彈樂」，係一個Mini版跳樓機，危險度就大減，只有大概一層樓高，只要做足安全措施，小朋友玩就絕對安全。小朋友想學做超級英雄？請先做「登峰奇兵」測試一下，場內有兩幅不同難度的攀石牆，可以按小朋友的年齡和能力去挑戰。喜愛速度感的小朋友，不妨玩埋「DC反斗戰車」，在特別通道上風馳電掣。講到最啱一家人玩，就係「華納極速迴旋」，坐住「宇宙飛船」喺黑暗空間內遊玩，家長都可以玩埋一份，同DC英雄一齊狙擊反派，一家人打到滿分而回。

小朋友在這裡開車，有DC英雄相伴之外，又可以一嘗扮大人駕駛的滋味。（李國星攝）

「反斗彈彈樂」除咗啱小朋友玩，家長都可以一齊玩。

攀爬時先要繫好安全帶，而職員亦會不時教路，幫助小朋友爬得更高。

卡通人物還會不時出現，和小朋友一起拍照，給大家驚喜。

info

華納滿Fun童樂園

價錢：MOP 200（一成人一小童）　

           MOP 340（二成人二小童）

鐵塔下的童話 戶外旋轉木馬

本澳大部分兒童樂園都設於室內，而巴黎人的「Q立方王國」，可謂少有擁有室外玩樂設施嘅兒童樂園。一踏入戶外區，就見到一個以城堡為主題嘅攀爬設備同滑梯，足夠小朋友盡情消耗體力，加上空間相對較大，大人入內一齊玩都很舒適。而城堡旁邊，就係浪漫與歡樂結合嘅旋轉木馬，也可以全家人一齊玩，一起享受溫馨時光。戶外任務完結，不如就返入室內，邊歎冷氣邊繼續玩。室內最受注目的是位於門口附近的「太空船」，作為室內主力攀爬設備同滑梯，「太空船」直衝天花板，小朋友可以進去任意攀爬，就好似進行太空任務咁，玩得非常投入。而電子遊戲方面，最有人氣的就是「Eye Click地板投射互動遊戲」，還有足球等益智遊戲，大人和小朋友自然可以交流更多。

旋轉木馬除咗小朋友玩得開心，大人都可以坐上去感受甜蜜時光。

「太空船」造型龐大，有些位置頗高，要年紀大一點的小朋友先可以玩。

大型波波池中間竟有吹風機，可讓波波球漂浮於空中，好神奇！

info

Q立方王國

價錢：MOP 130起（一成人一小童）

盡情消耗體力 幻彩充氣彈床

澳門銀河渡假城中，也有各式各樣精彩活動，當中包括專為小朋友而設嘅「JW兒童樂園」。同大部分兒童樂園唔一樣，這裡引進「寓教於樂」概念，可以一路玩樂一路學習。作為小朋友，當然係「玩」字當頭，一見充氣彈床就一支箭跑過去，瘋狂彈跳。充氣彈床採用透明材質，內裡閃燈有如舞臺燈光效果，而牆身都被氣墊包圍，相當安全，小朋友可以放任彈跳。而另一讓孩子瘋狂的，還有滑梯波波池，大家爬上城堡，由高處順著滑梯衝進波波池，開心透頂。場內還有另一特色，就是電子遊戲機室，內有各式電子遊戲，如跳舞機、四人「Air Hockey」和夾公仔機等，大人小朋友都啱玩。樂園旁邊還有「JW兒童髮型屋」，裡面有專業駐場髮型師幫小朋友打理頭髮，等小朋友玩到滿頭大汗之後，可剪個靚髮再去食飯。

樂園裡有不少經典電子遊戲，家長都可以和孩子一起享受快樂電玩時光。

髮型屋裡設有汽車造型理髮椅，加埋平板電腦，吸引小朋友靜靜坐低剪頭髮。

充氣彈床閃燈顏色變化多，四周有氣墊包圍，小朋友可以放肆彈跳。

info

JW兒童樂園

價錢：MOP 130起（一成人一小童）