夏天要晒超

很多亞洲人都沒有戴太陽眼鏡嘅習慣，眼睛日積月累受到陽光損害，有可能患上白內障、青光眼等眼疾，所以養成戴「超」習慣尤關重要。除咗功能性重要之外，太陽眼鏡更加係夏天配搭佳品，一「超」遮三醜，何其方便，而本季各品牌都特別流行無框及透明框款，就好似冰塊咁，睇見都覺得涼浸浸。

Miu Miu 貓眼看人

貓眼款太陽眼鏡，Miu Miu一定是當中嘅經典，不過過往推出嘅都係Bing bing、Sharp色等等嘅誇張款，如今就反璞歸真，將多餘裝飾通通拿下，令貓眼太陽眼鏡重新設計成簡約無框款式，鏡臂同埋雙橋部分就簡單以流線型作點綴，易Carry好多。另外，品牌今夏重點推介還有Cyber味重嘅Sorbet太陽眼鏡，大方形無框鏡片，有鐳射眼感覺。

粉紅色/茶色偏光鏡片無框太陽眼鏡 MOP 2,950

藍色無框染色鏡片太陽眼鏡 MOP 3,300

藍色偏光鏡片無框太陽眼鏡 MOP 2,950

Prada 不設框框

除了阿妹Miu Miu玩無框眼鏡款之外，作為家姐嘅Prada當然都有玩埋一份。光滑金屬鏡臂和鏡圈與鏡片前方嘅螺絲相連，具裝飾性，而鏡臂備有銀灰色、香檳金色同埋金色以供選擇，鏡片顏色則包括藍色、銀色、炭色和啡色等等，其中鏡片更印有暗紋圖案。

銀色雙橋款偏光鏡片無框太陽眼鏡MOP 2,950

Dolce&Gabbana賣弄風情

講到賣弄風情，正正就係Dolce&Gabbana嘅拿手好戲。玩完西班牙民族，今季就返故鄉，以意大利南部風情為靈感做主題，名為「Tropico Italiano」，將當地特色融入服裝設計中，滿載鮮花、水果等元素。而今季太陽眼鏡系列當然亦同樣沿用呢個主題，粗透明框配上同色系圓鏡片，綴以水晶花卉圖案，好搶眼！

粉紅色粗透明框水晶花卉圖案偏光鏡片太陽眼鏡 HK$8,800

Tiffany&Co.優雅蝴蝶

平時買Tiffany都係貪佢出品嘅戒指、手鈪刻有「T&C1837」，自我感覺確實良好。近日就連Tiffany&Co.出產嘅太陽眼鏡都有同一個設計。鏡臂前端刻有「T&C1837」虛榮感十足，而整體款式為無框蝴蝶形太陽眼鏡，金屬曲線鏡臂線條優雅靈動，識揀當然係揀漸變TiffanyBlue鏡片顏色。

深藍漸變Tiffany Blue無框太陽眼鏡 HK$2,650